Jun 29, 2010

Aawara Kalam

Phir kuch lamhe guzare, aur unke baad
Ek shaayar ka nazma, kuch yun yaad aaya
Ek korey kaagaz pe, dil ke kissey bayaan kare
Aur phir kuch kisson mein, khud ko uljha paaya

Kuch kisson mein, mera zikra tha aur kuch aise
Jaise main khud ko dhoondti hi jaa rahi thi,
Aur is talaash mein, ek ajnabee saksh saamne aaya
Wo saksh, jo mujh mein tha, mujhsa hi, par phir bhi
Us sey dooriyan kuch is qadar badhati gayeen,
Ki jab kuch arson baad, uska phir khyaal aaya
Main door, bahut door jaa chuki thi, us har ek pal mein
Shayad meri talaash hi, meri sakshiyat ka pehchaan thi..

Door in raahon pe, aaj bhi kisi ka intezaar tha...
Bas usi ajnabi ki talab mein, umra kaatati jaa rahi thi
Kuch aur manzilein tay karti jaa rahi thi, aur bekhayaal
Un raahon pe, kuch aur naye kissey, mujhse waakif huye
Jinki mujhe koi justjoo naa thi, bas aawargi mein mashroof they
Meri aawara kalam, kuch naye muqaam aur kuch purani yaadein...

Koi aawaaz nahi, wahaan ek gumnaam khamoshi thi,
Mere saath phir bhi, ek badgumaan si behoshi thi
Jisme talaash thi, kuch kisson ki, kuch baaton ki
Kuch yaadon ki aur phir tay karna tha, ye purana safar
Ek nayi ummeed ke saath, ki manzilein haansil to hongi
Aur, meri talaash mein shaamil hoga, wo humsafar bhi....